Кеше облыс әкімдігінде ШҚО әкімінің орынбасары Жақсылық Омардың төрағалығымен туризмді дамыту мәселелері бойынша кеңес өтті. Оның барысында Катонқарағай ауданының туризмін дамыту жөніндегі мастер-жоспар таныстырылды, деп хабарлайды Устинка LIVE тілшісі.
«Ауылдық аумақтарды тұрақты дамыту» қоғамдық қоры Шығыс Қазақстан облысында, соның ішінде Катонқарағай ауданында 2019 жылдан бері жұмыс істеп келеді. Қор жетекшісі Фатима Герфанова өз жұмыстарында ауданның алдағы жылдары өмір сүріп, дамитын болашағын болжайтын жоспарлау әдісін қолданатынын айтты. Оның сөзінше, экономикалық тұрғыдан аудан саналы туризм кластері ретінде дамиды.
Қоршаған орта тұрғысынан бұл — еліміздегі нөлдік шығарындылар аймағы болатын алғашқы аудан. 2019 жылдан бері туризм саласында шамамен 75 жоба іске асырдық, — дейді Фатима Герфанова. — Оның ішінде қонақ үйлер мен қонақ үйлерін (гостевой дом) қолдау да болды. Мысалы, біз Берелге барған кезде онда мүлде қонақ үйлер болмаған, тұрғындар біз ұсынған қонақ қабылдау үшін грант бөлу бастамасына күмәнмен қарады.
Бүгінде, мысалы, Коробиха ауылында бес қонақ үй жұмыс істейді: оның үшеуін туроператорлардың бірі ашса, екеуін жергілікті тұрғындар іске қосқан. Сондай-ақ Қор туристік инфрақұрылымға арналған жобалық-сметалық құжаттаманы дайындап, қонақжайлылық мектебін ұйымдастыруға көмектесті.
Жоспарды әзірлеуге швейцариялық PKF компаниясы мен «Kazakh Tourism» қатысып, сарапшы ретінде Kat’n’go директоры Анатолий Савичев тартылды.
Фатима Герфанованың айтуынша, Катонқарағай ауданындағы туризм экологиялық және экономикалық тұрақтылықты да, сондай-ақ тұрғындардың ауданнан көшпей, өз жерінде жайлы өмір сүруіне мүмкіндік беретін әлеуметтік-экономикалық дамуды да қамтиды.
Катонқарағай ауданын саналы туризм орталығы ретінде дамыту үшін бес негізгі бағыт қарастырылған:
— экономика мен экология арасындағы тепе-теңдікті сақтау;
— Green Destination сертификатын алу, яғни тұрақты туризмді дамыту орталығы ретінде танылу;
— ұлттық паркті басқарудың жаңа моделін енгізу;
— жергілікті экономиканы әртараптандыру;
— жергілікті тұрғындарды туризмді дамытуға кеңінен тарту (бұл Катонқарағай үшін басты фактор), — деп атап өтті ол.
Мастер-жоспарға сәйкес, алдағы 30 жылда Катонқарағай ауданында 75 қонақ үй ашылып, шамамен 800 тұрғын туризм саласында жұмыспен қамтылады.
— Катонқарағай ауданына ерекше мәртебе беру ұсынылып отыр, — деді Жақсылық Омар. — Қалай ойлайсыздар, бұл дұрыс па? Бұл, ең алдымен, туризмнің маңыздылығы тұрғысынан қарастырылып отыр. Идея жақсы, жергілікті тұрғындарға да ұнайды.
Kat’n’go директоры әрі туроператор Анатолий Савичевтің айтуынша, ауданға ерекше мәртебе беру идеясы жайдан-жай алынбаған, ол Жаңа Зеландия мен Бутан секілді — экожүйесі нәзік, жергілікті қауымдастығы осал аймақтардың халықаралық тәжірибесіне сүйене отырып ұсынылған.
ФУР өкілдерінің пайымынша, 2040–2050 жылдарға қарай Катонқарағай әлемдегі тұрақты туризмнің мойындалған орталықтарының біріне айналуы мүмкін. Неліктен мұндай болжам жасалады? Анатолий Савичевтің түсіндіруінше, пандемиядан кейінгі кезең туризм саласына айтарлықтай әсер етті. Көптеген адамдар аутентті, ерекше жерлерге саяхаттай бастады, ал Еуропаға немесе Мальдив аралдарына стандартты сапарлар енді ешкімді таңғалдырмайды.
— Біздің қолымызда төлем қабілеті жоғары шетелдік туристерді осында тартуға жеткілікті зор әлеует бар, — деп атап өтті Анатолий Савичев. — Бұл ауқымды стратегия дұрыс іске асырылған жағдайда, бір аудан ең алдымен экономикалық тұрғыдан өзін-өзі қамтамасыз ете алатын деңгейге жетеді, яғни дотациялық болмайды. Уақыт өте келе ол көрші аудандарға, тіпті облысқа да қолдау көрсете алады. Біз бұл бойынша есептеулер жүргіздік, мүмкін өте дәл емес, бірақ Қазақстанның үздік экономистерімен бірге жасадық.
Оның айтуынша, нәтижесінде 2050 жылға қарай аудан тек туризм саласының өзінен шамамен 28 миллиард теңге табыс таба алады.
Жақсылық Омар қорытындылай келе, туризм, энергетика, көлік және байланыс басқармаларының басшылары өз жұмыстарын осы мастер-жоспарға сәйкес жүргізуі қажет екенін атап өтті. Жақын арада қор мен әкімдік арасында келісімге қол қою күтілуде. Сондай-ақ ол Тұрақты даму қоры туризмді дамытуға жыл сайын 100 млн теңге бөлетінін айтты. Бұдан бөлек, қор Катонқарағайда визит-орталық салу үшін жеке инвестицияларды тартуды бастап кеткен.
Дереккөз: ustinka.kz
Аударма: VisitEastKZ
